Vladimir Poljanec – književnik

Predgovor katalogu na izložbi slika u dvorcu »Gredice« u Zaboku 1996.g.

Vikendauškim veltnšaungom fpropaušteni pejzauži, desetletjima sustauvno i skoram vničeno gospodaurstvo, totaulno do deske tautski pokraujeni agrauri i zelejni plauni, sprklejtimi naučinami i idejolouški nafutranimi, a pounopregljiboko spout kouže zavlečenim i h mentaulne skloupe zadojenim, zapretili v jenem so cajtu kaj bi se naši traniki i jive, oblauki i hiže v amorfni mausi zgubili, vu unisouni bizauntinski jednaučbi.
Kaj je to denes jenem naušem poštenem slikauru z velkimi znatiželnimi očmi i z velikim pošteinim srcem, bogautom i veličajnom dušom, kaj mu je za fčiniti vu denešnjem dnevu, gda si človek, človeka išče, gda nigdo i nišer z jengovega brega videti nemre to kaj on vidi, kajti mu je vougel z jengovega vidikofca samo jengof. A to je ouno kaj nas zanima.
Gornjosutlaunskim prostourom zmet Cesargrauda i Miljane, Velkega Taubora i Velke Horvaucke zadaune je motifski i interesno predodrejeno slikarstvo Marijana Zanoškoga. Taktuj človek hoče-neče jednostauvno slikarom ili pojetom moura postauti, kajti Horvaucki i Tuheljski poutok graube i jaurke skupaj s paplinom je treiba na kipec deti, če se kaj spametnejšega ne pripeti, a kruze su i jive, traniki i houste, čiste hmite, opraune glih takšne tak iste kak na glažouviju. Naslikati se oune svouje i mouje vauše i nauše breige, trnauce, kruze i detele, najrajše pejzauže namaulati na glauže, naj se vidi naj se pokauže, kere nišer do zdej tak neje narisal, še mej kaj bi kaj taukšnega kaukšni pojeta napisal, se nauše puraune, gouske i rauce, zmed bregof vouske potouke, to listje kuruze, buče skošicami, to žlundrasto zelje, beilo i čerlejno koreje i paužulj bogečko vesejle i krvauvi žulj. I protilet i jejsen nisu drukči, ni lepši ni hujši. Ti kipci so bogauti, vesejli i puni kouk biseri v Horvaucki kruni.
Tak veliju kipci po glauži i popejvleju starinsku popejfku z naših breiguf keiru čujeju i posljušaju samo zebrauni, kati tak nekaj za saukega i ni. Neje to več samo idila, pastorala bi rekli, nek prauvi trnauc, prauvo prafcauto trsje domaučom i nježnom roukom obdelauvano, prauva jiva kruzom i šenicom zaseijana, žmehkom mukom okaupana, tuj se prauf zaprauf i vidi kaj to človek obdelauvlje, čuva i pauzi, pak se ljubaf maur i troud v jejsen povrne i isplauti. Tuj i tam bi se mogouče, činiti moglo kaj na slikah človeka ni. No iza sega teiga je človek i zopet človek z velikim Č . Marijan Zanoški ni figurativec i animalist. Objekt je zanimanja jengovega i kakti prvo, majčica natura kouk daur Boužji i v jej i na jej produkti i rezultauti človekovih rouk. Popejfke h farbi s penzlinom spopejvane, oude so i himne Proseniku i Tuhlju, Zagorju i ceiloj Leipoj Naušoj Horvauckoj Domovini.

Vladimir Poljanec